Dizze trije wurden steane boppe-oan de kaart wêrop wy it ferstjêrren meidielden fan myn leave frou en ús hertlike mem AALTJE JANTJE VAN DER MEER – SEIJDELL. Aaltje is 85 jier wurden. Se is stoarn yn Amerongen, wêr’t wy troch it jier hinne wenje. Mar in grut diel fan dy 85 jier hat se trochbrocht yn Heech, faaks yn de wykeinen en yn elts gefal yn de fakânsjetiid. Ein foarige iuw kochten wy op it Eilân in wenning, in appartemint op nûmer 17. Wy hienen doe trije bern. Dy bern ha wy noch, mar no mei harren partners en mei harren neiteam. It folkje hâldt fan Heech en fan Fryslân. It appartemint is sadwaande in folslein fakânsjehûs wurden.
Myn frou Aaltje hold fan farren mar noch mear fan ús famylje. Se slagge der treflik yn om de famylje sa fier en sa folle as mooglik by inoar te hâlden. Ein foarich jier krige Aaltje lêst fan har hert. De húsdokter soarge dat se deis nei krysttiid yn it sikenhûs yn Utrecht te lâne kaam. Dêr krige Aaltje it minne beskie dat hja medysk net mear holpen wurde koe. Se is nei ús hûs yn Amerongen werom kaam. Trije wiken lang ha wy de gelegenheid krigen om yn alle rêst mei bern en bernsbern ôfskie fan har te nimmen. Op de 18e fan de moanne jannewaris is Aaltje stoarn. Se is fanút de iuwenâlde doarpstsjerke nei har lêste rêstplak brocht.
Wy ha dêrnei ûnder mear fanút Heech, fan de bewenners fan it Eilân en ek nammens de folsleine redaksje fan de Sylboade, in soad berichten fan dielnimmen krigen. Aaltje soe dat moai fûn ha. Wý fine it yn elts gefal tige de muoite wurdich. Wy wolle op dizze manier al dy minsken graach en fan herte betankje!
Symon van der Meer